Dinayaw ni House Committee on Higher and Technical Education Chair Rep. Jude Acidre ti panangirusat ti “TESDA Skills Passport,” a para kenkuana ket naintiempuan a reporma para iti technical and vocational education and training (TVET) iti pagilian.
Segun ken ni Acidre, ti nadakamat nga online platform ket direkta a sungbat kadagiti pagkapsotan a natakuatan ti komision tapno marisut ti skills mismatch ken underemployment kadagiti Pilipino.
Iti salinong ti Skills Passport ti TESDA, dagiti mangmangged ket mabalin nga agurnong ti training records, National Certificates ken competencies iti maysa a secure a digital platform a mangted ti access kadagiti scholarship ken job matching.
Ilong-longalong pay ti agpampanday linteg ti Enterprise-Based Education and Training (EBET) Framework Act tapno mapatibker pay ti koordinasion iti nagbaetan ti pagadalan ken kompania para iti apprenticeship ken up-skilling dagiti mangmangged.
