VIGAN CITY – Saan a kasapulan ken inappropriate, dayta ti panangibilang ni Benjo Basas ti Teachers Dignity Coalition kadagiti trending ita a panangited ti money garland ken money boquet kabayatan ti graduation ceremony.
Iti pannaki-uman ti Bombo Radyo Vigan ken ni Basas, no kayatda nga ited ti nasao a banag ket namaymayat laengen a kadagiti balayda tapno saan a madadael ti kinasagrado ti seremonya ti graduation.
Panawaganna kadagiti nagannak a saanda nga aramaten ti graduation tapno laeng iparangarang ti kabaelanda iti biag ta saan nga agpapada ti estado ti tunggal maysa.
Innayonna a ti panangited ti napalaus a kuarta kadagiti nagturpos nangruna no adda pay laeng iti kolehiyo ket saanen a kasapulan agsipud ta maibilang a nababa pay laeng a pagteng ti panagadal ti naragpatda.
Kiddaw ti opisial a mapagtalinaed ti kinasagrado ti seremonya ti panagturpos.
