Naalarma ti grupo dagiti mangisursuro iti plano ti Department of Education a mangisayangkat iti Saturday make-up classes ken mangipatungpal iti remote learning iti panawen ti didigra.
Nagballaag ti Teachers’ Dignity Coalition ta mabalinna daytoy a pakaroen ti pannakabannug unay dagiti estudiante ken mangisursuro, nangruna kadagiti lugar a nakaro nga inapektaran dagiti bagyo ken habagat.
Kinontra ti TDC ti plano ti DepEd a mangisayangkat iti make-up classes kada Sabado tapno supusupan dagiti klase a nasuspenso gapu iti saan a nasayaat a paniempo ta patienda a ti addang ket maikontra iti agdama a patakaran a mangipangruna iti kinapateg ti inana ken oras para iti pamilia.
Immunan a pinasingkedan ni DepEd Secretary Sonny Angara ti panagkasapulan iti make-up session gapu iti masansan a madi a paniempo ket kada Sabado ti planona a pannakaisayangkat, depende iti availability ti mangisursuro ken school logistics.
