Nagpanawagan ni Senate Minority Leader Alan Peter Cayetano a nasken a mangbukel iti gobierno ti maysa a task force kadua ti Department of Public Works and Highways (DPWH), Department of Environment and Natural Resources (DENR), ken Department of Science and Technology (DOST) tapno masigurado a dagiti flood control project ti gobierno ket maibasar iti siyensa saan nga iti politika.
Impaganetget daytoy ni Cayetano kasaruno ti panangibutaktak ti DENR iti maysa a budget hearing nga adda natakuatanda a flood control structures ti DPWH a ‘poorly situated’ wenno adda iti madi a lugar.
Imbutaktak pay ti DENR a pinadasda nga imbaga daytoy iti DPWH idi napalabas a tawen ti maysa a draft-flood control master plan ngem saan daytoy nga inkonsiderar ti ahensia.
Nagpanawagan ti suporta ni Cayetano iti komprehensibo a plano ti DENR a nasken a panunuten iti amin a public works project ti nasayaat a kondision ti panangipatungpal ti maysa a proyekto. – Reynand Fontejon
