Papaimbestigaranen ni Presidente Ferdinand Marcos Jr ti baro nga insidente ti tanim-bala idiay Ninoy Aquino International Airport.
Segun ken ni Palace Press Officer Usec Claire Castro, siguradoen ti Malakanyang a madusa ti asinoman nga adda pakainaiganna iti insidente.
Saan nga ipalubos ni Pres. Marcos a maulit manen ti modus ta saan a napintas nga imahe daytoy ti pagilian nangruna no turista wenno pada a Pilipino ti mabiktima.
Maipalagip a nag-viral ti maysa a video iti social media a nalapdan ti bagahe ti senior citizen iti airport idi Marso 6 kalpasan a makataan iti bala wenno anting-anting ti bagahena.
Inikkat metten ni Transportation Secretary Vince Dizon dagiti kameng ti Office for Transportation Security a karaman iti kabaroan nga insidente ti tanim bala idiay NAIA.
