VIGAN CITY – Tallo ti nakemmeg a nagsusugal iti naisayangkat nga anti-illegal gambling operation idiay Barangay Apatot, San Esteban, Ilocos Sur.
Nabigbig dagiti suspek a da Dante Cadano Timoteo, agtawen iti tallopulo ket siam; Jeffrey Bermejo Almazan, agtawen iti duapulo ket innem; ken ni Rudy De Leon Ayson, agtawen iti innem a pulo ket tallo, agpapada nga agnaed iti nasao a lugar.
Nakaawat ti San Esteban Police Station iti tawag manipud iti concerned citizen a mangibagbaga nga adda agsusugal iti kubo nga asideg iti basketball court idiay sitio Tapuk Center.
Dagus met nga insayangkat dagiti pannakabagi ti linteg ti operasyon a nakatiliwan dagiti suspek nga agaayam iti pusoy.
Nupay kasta, maysa kadagiti suspek a ni Raymart Almazan, taga-Barangay Apatot, San Esteban ti nakalibas.
Naala ti maysa a set ti braha ken pusta a PHP1,389.
Sangwen dagiti suspek ti kaso a panaglabsing iti Presidential Decree 1602 wenno Anti-Illegal Gambling Act.
