VIGAN CITY – Lima ribo a pisos ti panangilako ti nagtakaw ti tallo a kalding idiay Brgy. Rugsuanan, Vigan City.
Iti pannaki-uman ti Bombo Radyo Vigan kenni Servillano Figuerres, April 7 idi napanna inwayway ti kaldingna iti taltalon a kukua ni City Councilor Dr. Bennedict Kristine Figuerres ket idi April 8 naduktalanda a natakaw ti tarakenna.
Nakitada ti CCTV nga adda iti dua a lugan nga aggapo ti daya ken laud a pattienda nga iso iti nangilugan ken nagtakaw kadagiti kalding nga iso da Leymarc Casinova, Jun Lcero ken Benhur Varcarce agpapada nga agnaed ti Brgy. Paing, Bantay.
Narekobre dagiti tallo a kalding babaen kenni Melchor Reboldera ta impakammuna ti biktima nga adda iti kalding a mailaklako ti social media ket idi napanda kinita iso ti kalding a natakaw nga inlako dagiti tallo a suspek kenni Marlo Astrande iti gatad a lima ribo a pisos.
Ti agdama naisubli dagiti tallo a kalding a tinakaw dagiti suspek.
