Nasurok-kumurang P200,000 ti gatad ti SUV a nauram iti batog ti maysa a grocery store idiay Barangay San Antonio, Narvacan, Ilocos Sur.
Ti nasao nga SUV ket maysa a Pajero 1998 a minaneho ti maysa a lalaki nga agnaed met laeng iti nasao a lugar.
Iti pannaki-uman ti Bombo Radyo Vigan ken ni SFO3 Rhea Cordero nga Officer-in-Charge a Municipal Fire Marshal iti Narvacan, bayat ti panagmaneho ti driver ket napansinna a kellaat a nagasok iti tugaw iti lugan isu nga insardengna idi nakabatog iti maysa a grocery store.
Segun ken ni Cordero, napaspas iti pasamak ta idi bimmaba ket isun ti pannakakitana ti apoy a napaspas a nagkayamkam.
Immarayat met dagiti kameng ti grocery store ta nagaramatda iti fire extinguisher a pinangdepdep ngem gapu ti napaspas a panagkayamkam iti uram ket saanda a kinabaelan gapu iti kinabara ken kellaat a panagdakkel ti apoy.
Nasurok lima a minutos a nagpaut iti uram ket awan iti naisalbar iti uneg ta nadadael amin.
