Impaganetget ti Philippine College of Physicians (PCP) a ti panangpataw iti innem a bulan a suspension kontra ken ni Dr. Anthony “Tony” Leachon ket gapu iti nainget nga ethics process a naisayangkat kasaruno kadagiti maipatpatungpal a pagannurotan iti organisasyon.
Segun ti PCP, ti pangngeddeng ket nakabasar iti Constitution-da, By-Laws, Code of Ethics, ken dagiti naituding a disciplinary procedures.
Immunan a sinuspenso ti PCP ni Leachon kalpasan a napaneknekan a naglabsing ti Code of Ethics maipanggep iti mapapati a makadadael a sarita ken dagiti akusasyon kontra iti padana a doktor nga awan ti umdas nga ebidensyana.
Binigbig met ti PCP iti karbengan ni Leachon nga aramaten dagiti remedy a nakaipauneg kadagiti patakaranda ken kadagiti maipatpatungpal a linteg.
Kagiddan dayta ket kinuna ti organisasyon a dagiti patangan nga adda iti korte ket rumbeng a baybay-an iti husto a proseso ti hudikatura.
