VIGAN CITY – Rimmuar ti imbestigasyon ti Galimuyod PNP nga ado pay iti nakautangan ti suspek a nangloko ti gayyemna iti nasao nga ili.
Iti pannaki-uman ti Bombo Radyo Vigan kenni PCpl. Christian Rodriguez, naduktalanda a kalaksidan ti dua a naaramat a nagan iti panagutang ado pay dagiti nakautangan ti suspek a ni Sheryl Gapate ngem aggatad laeng ti tallo ribo a pisos a manon a tawen a saanna a binayadan.
Naduktalan pay ti PNP a dagiti inaramat a nagan ti suspek tapno umutang ket saanda a kamammu ni Gapate ken dagiti dokumento nga adda ti pirmana ket pinasingkedanda a saan nga iso ti pirmada a nakailanad borrowers letter.
Innayon ni Rodriguez nga empleyado ti munisipyo ni Gapate a caretaker ti quarantine facility ngem idi bulan ti Disyembre saanen a simbrek ken saan a nagpakada ken mapapati a napan idiay Bacolod.
Nagpalagip pay ti pulis kadagiti umili a kitaen a nalaing dagiti tattao nga pautanganda tapno saan a mabiktima ti Estafa.
