VIGAN CITY – Naipilan iti kaso a murder kontra ken ni Alberto Rosal a taga-Salomague, Cabugao a maitudtudo a nangpaltog ken nakapatay ken ni Marlon Delfin Garcia nga agtawen iti lima pulo, naasawaan, mangngalap ken agnaed iti nasao a barangay idi alas dos singkuwenta y singko ti agsapa idi May 25.
Segun ken ni Police Lieutenant Romar Renon, hepe ti Cabugao municipal police station, ti mismo putot ti biktima iti nakakita iti pasamak ta nasaruno na ti ama na nga agawid iti pagtaengan da a naggapu iti barangay plaza.
Pinasingkedan ni Renon nga adda iti sigud a saan a panagkinnaawatan ti biktima ken ti suspek gapu ti tsismis a dimmakkel ket nairaman ti assawa ken annak agingga a nagbibinnansag ken naggiginnubal da pay iti parangan da.
Mainaig dayta, maibilang a case cleared iti nasao a pammaltog ta nabigbig met ti suspek ken naipila payen iti kaso kontra kenkuana.
