VIGAN CITY – Nakaruaren iti pagbaludan ti suspek iti pammagkong iti kallabes a ni Jeffrey Reyes, agtawen ti tallo pulo ket uppat nga agnaed idiay Brgy. Cabaroan, Bantay agsipud ta nangipila ti pamilya ti binagkong ti suspek ti affidavit of desistance a mangipasimudaag a saan dan nga interesado a mangituloy iti kaso kontra kenkuana.
Ti suspek ket sumangsango ti kaso a frustrated homicide nga isu iti nakakemmegan na.
Kabayatanna, temporaryo a nawayawayaan ti suspek iti pammaltog a ni Dennis Baldoviso Tiri, agtawen ti tallo pulo ket siam, naasawaan, caretaker ken agnaed idiay Brgy. Manzate, Magsingal ta nakapagpiansa iti gatad a walo pulo a ribo a pisos inaig iti kaso na a frustrated murder.
Nakemmeg ti suspek babaen iti bileg ti warrant of arrest nga imparuar ni Hon Judge Homer Jay Ragonjan ti Regional Trial Court Branch 24, Cabugao a napetsaan idi November 28 iti agdama a tawen.
