VIGAN CITY- Napunuan ti suspek iti kanayon a panangkarkarit kaniana ti biktima isu a naaramidna a patayen iti bukodna kabagyan idiay Brgy. Bantaoay, San Vicente, Ilocos Sur.
Nabigbig ti suspek a ni Eddie Battad Rebullo, agtawen iti uppat a pulo ket dua, idinto ti biktima ket ni Mario Ullero Rebullo, agtawen iti limapulo ket lima, agpada a residente ti nadakamat a lugar.
Iti pannaki-uman ti Bombo Radyo Vigan kenni Police Captain Pedro Halover ti San Vicente Municipal Police Station, nakaawatda iti report mainaig ti nasarakan a bangkay ti nasao a lugar, isu a dagus da a napan nagresponde.
Basar iti panagembistigarda, naamuanda a bigbigat pay laeng ket agininumen ti biktima kaduana dagiti gagayemna idi November 12.
Alas siete iti rabii, napan kinarit ti biktima ti suspek a rummuar ti pagtaenganda tapno agpinnatayda.
Gapu dayta, idi makaawid ti biktima iti pagtaenganda, sinaruno daytoy suspek ket dita a minalona iti kawayan ti ulona iti tallo a daras a gapuanan ti pannakatayna.
Segun kenni Police Captain Halover, bigaten idi masarakan ti asawa ken anak ti biktima ti bangkayna.
Indeklara ti doctor a ti nakatayan ti biktima ket hemorrhagic shock secondary to traumatic head injury.
Agipila ti asawa ti biktima kontra ti kanakanda a suspek, ken i-refer da iti fiscal office no maibilang daytoy a murder case.
