Agtalinaed ni Susan Yap-Sulit iti puestona kas Tarlac City Mayor kasaruno ti panangiruar ti Korte Suprema ti ‘status quo ante order’ iti kaso nga impilana kontra iti resolution ti Commission on Elections (COMELEC) ita a tawen.
Impasa ni Yap-Sulit ti ‘petition for certiorari’ a kiddaw a mangiruar ti korte iti temporary restraining order (TRO) ken/wenno status quo ante order kas panangkuwestionna iti naipaay a resolution ti COMELEC maipanggep iti pannakadiskualipikana nga agkandidato para iti Mayoral position ti nasao a siudad iti napalabas nga eleksion 2025.
Gagem ti nairuar nga ‘status quo ante order’ a mataginayon ti kasasaad dagiti partido sakbay a maipaulog ti desision ti COMELEC En Banc bayat a naka-pending pay laeng ti kaso.
Binilin met ti kangatoan a korte ti pagilian nga ipasa dagiti respondent ti komentoda iti petition iti uneg ti sangapulo nga aldaw. Augie Arellano
