VIGAN CITY – Naibusen ti suplay ti face mask kadagiti naduma-duma a botika ditoy syudad ta idi pay laeng napasamak iti phreatic eruption ti bulkang Taal ket awanen iti magatang a face mask dagiti umili.
Segun ti maysa nga aglaklako, idi pay laeng napasamak ti phreatic eruption ket naibusen dagiti ilaklakoda a face mask agingga itatta a kasapulan manen kas maysa kadagiti kangrunaan a pangliklik iti agraraira a novel coronavirus.
Sakbay a naibus ket umabot ti walo a pisos ti gatad iti kada piraso iti ordinaryo a surgical mask ken uppat a gasut a pisos ti maysa a karton a naglaon ti lima pulo a piraso.
Ti agdama, maiyur-uray iti suplay nga aggapu idiay Dagupan ngem posible nga awan iti mauray da agsipud ta pati iti nasao a lugar ket agkurkurang pay iti suplay da ta gulgulpiyen dagiti aggatang.
