Pinasingkedan ti Department of Health a makanay ti suplay dagiti agas ditoy pagilian ken impasiguradona nga awan ti manamnama a panagpangina ti presiona uray adda krisis iti enerhia.
Segun ken ni Herbosa, linawas nga imonmonitor ti ahensia dagiti 10 a kangrunaan nga agas, agraman ti para iti hypertension, diabetes, cholesterol, ken antibiotics tapno masigurado nga awan ti panaggundaway iti merkado.
Nadakamat pay ni Herbosa nga iti salinong ti Cheaper Medicines Act, nabilin ti DOH, Department of Trade and Industry, Department of the Interior and Local Government, ken dagiti lokal a gobierno a bantayan ti presio dagiti kangrunaan nga agas.
Mabalin a kitaen ti publiko ti presio ti agas babaen iti drug price watch iti eGovPH app, a pakakitaan ti kaasitgan a botika ken kalakaan a presio dagiti agas.
