VIGAN CITY- Maamak dagiti sumagmamano a mannalon ditoy probinsiya ta posible nga awan iti maapit da gapu ti panagduprak ti Bagyo Ompong ta saan pay a nadanun dagiti pagay ti maturity period da.
Segun ken ni Vigan City Agriculture Officer Rudy Peralta, nu saan pay a nakaala iti bagas wennu agibun-bun-ay pay laeng ti bunga na dagiti pagay ket dupraken ti napigsa a tudo ken angin, sigurado nga awanen iti apiten dagiti mannalon.
Ti laengen balakad ni Peralta kadagiti mannalon ket apiten dan dagiti pagay da uray nu saan pay a nadanun ti maturity period ket ilako dan kadagiti aggatgatang ti saan a nabilag nga irik.
Kabayatanna, dinayaw met ni Office of the Civil Defense- Region 1 Director Melchito Castro ti panagsagsagana iti probinsiya ken ti panangidaulo ni Governor Ryan Singson.
Kinunana, nu amin kuma a gobernador iti pagilian ket kas ken ni Singson ken dagiti amin a gobernador ditoy Region 1, posible a saanen a kasapulan pay iti panagresponde ti National Disaster Risk Reduction and Management Council nu adda iti dumteng a didigra.
