Kayat ni Senador Sherwin Gatchalian nga ingato ti subsistence allowance dagiti kameng ti Philippine Coast Guard (PCG) manipod P150 ket agbalin a P350 kada aldaw tapno maipada iti maaw-awat dagiti suldado ken dadduma pay a uniformed personnel iti gobierno.
Segun ken ni Gatchalian a chairman ti Senate Committee on Finance, gagem dayta a mapagtalinaed ti nangato a morale dagiti Coast Guard personnel ken maipakita ti panangbigbig iti kinatibkerda ken sakripisyo nangruna iti agtultuloy a panag-harass iti China Coast Guard ken dadduma pay a pangta iti West Philippine Sea.
Impaganetget ti senador a ti panagpatrolya iti Coast Guard ket saan laeng a simple a trabaho nu diketdi sakripisyo para iti pagilian.
Kinunana a makatulong iti nayon nga allowance tapno makissayan iti rigat dagiti miembro ti PCG ken maipakita nga ipatpateg iti gobierno iti serbisyoda.
Nasurok 20,000 a Coast Guard personnel iti mairanud iti gakat iti panagpangato iti subsistence allowance a mabalin a mairaman iti proposed 2026 national budget.
