VIGAN CITY– Pabor ni Magdalo Partylist Representative Gary Alejano iti linteg a mangited iti subpoena powers iti Philippine National Police (PNP) chief pakairamanan ti Director ken Deputy Director for Administration ti Criminal Investigation and Detection Group (CIDG) ngem nagballaag a no saan a mausar iti usto ket agresulta iti harassment.
Segun kenni alejano, babaen ti subpoena powers ket ad-adda nga epektibo ti PNP ken nadardaras iti imbestigasyon da agsipud ta saanen a kasapulan a dumalan iti korte tapno isubpoena wenno paayaban iti maysa a tao.
Pagamkan laeng ni Alejano a no saan a mausar iti nasayaat ken maabuso iti linteg ket dakes iti agbalin a resulta na nangruna itatta ta nga ado dagiti kontrobersyal a sangsanguen ti PNP kas iti nagsasarano a pammapatay.
Inpaganetget ni Alejano nga ado dagiti nasasayaat a pulis ngem ginuygoy na dagiti umili a bantayan iti pannakaipatungpal iti nasao a linteg tapno awan iti malabsing iti karbengan na.
