Isingsingasing ti Sugar Regulatory Administration (SRA) ti pannakapatalinaed ti nababa a buwis kadagiti mainom a malalaokan iti natural nga asukar tapno salwadan ti lokal nga industria ti asukar.
Segun ken ni SRA administrator Pablo Luis Azcona, nasken nga agtalinaed iti Tier 1 dagiti mainom a malalaokan iti cane sugar idinto a mayakar iti Tier 2 dagiti agar-aramat iti artificial sweeteners.
Iti salinong ti gakat a ProGRESS Bill ti Department of Finance, maingato ti excise tax kadagiti mainom nga adda iti Tier 1 manipud iti P6 a nagbalin a P20 kada litro, idinto a manipud iti P12 a nagbalin iti P40 kada litro met ti buwis kadagiti mainom a malalaokan iti high-fructose corn syrup.
Nagballaag dagiti lokal a sugar miller a mabalin a bumaba ti demand iti lokal nga asukar no agpangato ti buwis, ta posible a maksayan ti produksion, maingato ti presio wenno agaramat iti alternative sweetener dagiti kompania ti mainom.
