VIGAN CITY – Patien ni Bombo International Correspondent Lydia Dela Cueva a taga-Santa ken maysa nga OFW idiay Fortaleza, Brazil a ti kinasukir dagiti agindeg ti rason no apay a kumarkaro ti COVID19 iti pagilianda.
Iti pannaki-uman ti Bombo Radyo Vigan kenni Dela Cueva, uppat a pulo ket tallo ti nainayon manen a natay iti laeng nagpatnag ken nakarkaro tatta a panawen ngem kadagiti naglabas a bulan.
Innayon ni Dela Cueva nga arigna saan a mabuteng dagiti tao iti nasao a pagilian ta adun dagiti nagsubli kadagiti trabahoda ken masansan nga adun dagiti rumuar kadagiti pagtaenganda.
Malaksid iti dayta, adu dagiti aglablabsing iti social distancing ta agdudupudop dagiti umili a maysa kadagiti patienna a rason no apay a maikadua ti pagilianda kadagiti kaaduanen iti kaso.
