Normalen iti sitwasyon ita idiay Israel kalpasan ti pannakaleppas ti rinnupak iti nagbaetan iti Israel ken Hamas kalpasan iti dua a tawen.
Iti pannaki-uman ti Bombo Radyo Vigan ken ni Bombo International News Correspondent Rosalie Del Mundo Tica nga adda idiay Tel Aviv, nawayadan a rumuar a mapan gumatang kadagiti kasapulanda ta saanen a kas idi, a maminsan laeng kada bulan gapu ti butengda iti posible a panagbettak ta asideg iti tiendaan iti masansan idi a target.
Segun ken ni Tica, naikkaten iti danagda a mapan kadagiti paboritoda a lugar ta impadana iti sitwasyon ita idi kasangsangpetna pay laeng iti nasao a pagilian a naannayas ken nakappia.
Namnamaenna a saan laeng a temporary iti agdama a sitwasyon nu diketdi agnanayonen nga agtalinaed iti kappia iti lugarda ken saanen a maulit pay iti napasamak iti napalabas a dua a tawen.
Kabayatanna, siguradoen iti gobierno iti Israel nga amin a totally damaged a pasdek a nadadael gapu iti rinnupak ket bayadanda wenno ipasimpada ta dagiti umili nga apektado kadagiti nasao a pasdek ket impanda kadagiti apartment a marentaan ngem gobierno latta iti mangbayad.
