Insublin ti maysa a simbaan idiay Bulacan ti donasyon a lugan ti maysa nga opisyal iti Department of Public Works and Highways (DPWH) a mairamraman iti mapapati nga iregularidad kadagiti proyekto iti flood control.
Segun ti Pastoral Council iti San Pascual Baylon Parish wenno National Shrine of Our Lady Salambao idiay Obando, isublida ti maysa a Nissan Navarra pickup nga indonate ni dati a DPWH 1st District Engineer Henry Alcantara idi Hunyo idi napan a tawen.
Inlawlawag ti simbaan nga inawatda ti lugan nga “in good faith” ken tapno maaramat iti panangilibot iti image ti Birhen iti Salambao iti agduduma a parokya.
Ti addang ket kalpasan ti report a karaman ni Alcantara iti isyu ti korapsyon, isu nga inkeddeng dagiti lider iti simbaan nga isubli dayta babaen ti legal a proseso.
Ti pangngeddeng ket kasaruno iti bilin ti Diocese of Malolos ken ti Catholics Bishops’ Conference of the Philippines.
Nagkiddaw iti pammakawan iti parikoya kadagiti agpammati ken iti publiko ket impaganetgetda a ti inaramidda ket panangipakita iti takder iti simbaan para iti hustisya ken integridad.
