Inwaragawag ni Presidente Ferdinand Marcos Jr nga ipatungpal ti gobierno ti service contracting program mangrugi inton Abril 15, 2026.
Pinasingkedan ni Presidente Marcos iti maysa a video message nga idaulwan ti Department of Transportation ti nasao nga implementasion iti intero a pagilian.
Karaman iti service contracting ti EDSA Bus carousel program ken dagiti moderno ken tradisional a dyip nga adda rutana a dumaldalan kadagiti istasion ti LRT ken MRT agraman dagiti kangrunaan a hub ti transportasion.
Ti service contracting ket napondoan iti salinong ti General Appropriations Act para iti 2026 ken kinuna ni Chairperson Mendoza a ti programa ket maipatungpal iti kabiitan a panawen iti baet dagiti epekto ti kumarkaro a riribuk iti Middle East.
Maysa daytoy kadagiti addang nga ipatpatungpal ti gobierno tapno parmeken dagiti epekto ti riribuk.
