Naipaagas iti ospital ti maysa a senior citizen ken dagiti nagkalubbon iti motorsiklo a nakadungpar kenkuana iti national highway idiay Barangay Lungog, Narvacan, Ilocos Sur.
Nabigbig ti senior citizen a ni Jose Cordero Cauton, agtawen iti pitopulo ket pito, security guard iti Lungog Integrated School.
Ti met Yamaha Mio a motorsiklo ket minaneho ni Gerald Cruz Tejero, agtawen iti duapulo ket uppat, kinalubbonna ni Shaira Libo-on Gasmen, agtawen iti duapulo ket lima, agpapada nga agindeg iti nasao a lugar.
Agpapa-amianan ti motorsiklo a mapan iti Sitio Kakaldingan idin ta nagmenor gapu ta adda pumpon ket idi pinatarayna manen ti luganna, bigla a bimmallasiw ti senior citizen.
Saan a nakontrol ti drayber ti motorsiklo ti luganna ket natwangda iti kalsada, agraman ti nadungparda.
Nadunor ti nadumaduma a paset ti bagida ket naipaagasda iti ospital para iti naan-anay a pannakatamingda.
