Pimmusayen ti senior citizen a nadungpar iti motorsiklo idiay Barangay Sacuyya Sur, Santa, Ilocos Sur.
Nabigbig ti senior citizen a ni Carmen Bielza Burgonio, agnaed iti nasao a lugar.
Ti met ADV motorcycle ket minaneho ni Leopoldo Lagon Fabro, agtawen iti limapulo ket walo, Barangay Captain, taga-Barangay Duplas, Sudipen, La Union, backrider-na ti asawana a ni Isabel Dicang Fabro, agtawen iti limapulo ket siam, mangisursuro.
Iti pannaki-uman ti Bombo Radyo Vigan ken ni Police Captain Rovic Nelmida manipud Santa Police Station, agpapa-amianan ti motorsiklo idin ta bimmallasiw ti senior citizen isu a pinadas a lisyan ti drayber ngem nadungparna latta.
Gapu dayta, nadunor ti akin-kannigid a saka ti senior citizen ken gasgas ti nadumaduma a paset ti bagina ket naitaray iti ospital ngem natay bayat iti pannakatamingna.
Uray dagiti nagkalubbon ket nadunor met laeng ti nadumaduma a paset ti bagida.
Kabayatanna, saanen nga agipila iti kaso ti pamilia ti senior citizen kontra ti drayber ta nakasagana a makiareglo.
