Agataltalinaed iti ospital ti maysa a senior citizen kalpasan iti pannakadungparna iti four wheels a nangarado pay kadagiti tallo a lugan a nakaparking iti national highway idiay Barangay Sumagui, Sta. Maria idi kalman, April 10, 2026.
Ti senior citizen ket agnaed iti nasao a lugar idinto a ti nagmaneho ti Puraw a Toyota Tamaraw ket lalaki nga agtawen iti uppat a pulo ket dua a taga-Laoag Street, San Marcelino, Zambales kaduana dagiti pito nga inluganna.
Dagiti met nairaman a nakaparking a lugan ket dua a tricycle ken Mitsubishi Mirage.
Iti pannaki-uman ti Bombo Radyo Vigan ken ni PLt. Jenson Refuerzo nga Officer in Charge iti Sta. Maria Municipal Police Station, iti panagturong iti bagatan a direksyon ti Tamaraw ket mapapati a nagtugleb isu a rinampana iti akin-kannawan a paset ti national highway ket immuna a nadungparna iti kayo a poste sa nagderetso kadagiti nakaparking a tallo a lugan ken nakairamanan ti maysa a senior citizen nga adda iti nasao a lugar.
Segun ken ni Refuerzo, na-fracture ti tulang ti senior citizen isu a naipan iti ospital para iti pannakatamingna idinto a natumba ti poste a nadungpar ti Tamaraw ken na-damage dagiti 3 pay a lugan a nairaman.
No pay kasta ket nakapagpapatangen ti driver ti Tamaraw ken dagiti akin-kukua iti tallo a lugan a nairaman para iti pannakasimpa dagitoy.
Naammoan a naggapu iti siudad ti Vigan ti Tamaraw ta napan nagpasyar dagiti nakalugan ket agawidda koman idiay Zambales idi napasamak iti aksidente.
Maisagsaganan ti kaso a maipila ti driver ti Tamaraw a Reckless Imprudence Resulting in a Physical Injury and Damaged to Property.
