Natay ti senior citizen kalpasan a pinaltugan ti saan pay nabigbig a suspek idiay Barangay Malamin, San Juan, Ilocos Sur.
Ti biktima ket ni Juanito Yago, agtawen iti innem a pulo ket walo, agnaed iti nasao a lugar.
Iti pannaki-uman ti Bombo Radyo Vigan ken ni Police Major Benjamin Raquedan, kalkalpas a naginom ti biktima ken ti kayongna ket manarimaan idi nga agipakpakni iti naginomanda idi pinaltugan daytoy ti suspek.
Nangngeg met ti pamiliana iti putok ket idi rimmuarda manipud iti pagtaenganda, nakitada ti biktima a nakadasay iti asideg ti ridaw a dara-dara.
Naipaagas iti ospital ti biktima ngem naideklarar a dead on arrival.
Mapapati a shotgun ti inaramat ti suspek a pinangpaltog iti biktima.
Naglibas met ti suspek kalpasan ti pasamak ngem agtultuloy ti panangimbestigar ti kapulisan tapno mabigbig ti kinasiasinona ken no ania ti motibona iti pammaltog.
Kabayatanna, hustisia met ti kiddaw ti pamilia ti biktima iti kabiitan a panawen.
Segun ken ni Sheryl Yago, anak ti biktima, awan ti ammoda a nakariri ti amana ta nasingpet, saanna ammo ti agunget ken mapangnamnamaan.
Nagpanawagan pay ti anak ti biktima iti suspek a makonsensia iti inaramidna ken sumukon kadagiti pannakabagi ti linteg.
