Binallaagan ni Senate President Francis “Chiz” G. Escudero dagiti amin a kontraktor ti Department of Public Works and Highways (DPWH) a nairaman kadagiti anomalous flood control project a maibaludda no saanda a makipaset iti agtultuloy nga imbestigasion ti Senado.
Pinirmaan ni Senador Escudero idi kalman, Agosto 26, ti subpoena para kadagiti amin a kontraktor nga inbutaktak ni Presidente Ferdinand “Bongbong” R. Marcos, Jr.
Binallaagan ni Senador Escudero dagiti kontraktor a nairaman kadagiti mapagduaduaan a flood control project a tumabuno iti public hearing ti Blue Ribbon Committee a mangimbestiga kadagiti mapapati a graft ken kurapsion iti multibillion-peso project.
Karaman a naipaayan ti subpoena dagiti agasawa a Cezarah “Ate Sarah” Discaya ken Curlee Discaya, agpada a negosiante, a mapapati a makinkukua ti St. Gerrard Construction Corporation, ken Alpha and Omega General Contractor and Development Corporation, ti maikadua a kadakkelan a kontraktor a nakaala kadagiti dadakkel a proyekto iti flood control project a saan a makita.
Segun ken ti Senate President, interesado isuna kas ti adu nga umili a maamoan dagiti detalye dagiti nasao a proyekto, nangruna dagiti napundoan ngem saan a naibangon wenno ghost project, a kaaduan ket adda iti probinsia ti Bulacan. – Augie Arellano
