Dagus a pinalubosan ti Senate impeachment court a pumanaw iti witness stand ni Marivic Pareja, director ti House Legislative Archives and Museum Management Service kagiddan ti maika-sangapulo ket innem nga aldaw ti impeachment trial ni Vice President Sara Duterte.
Napasamak daytoy kalpasan nga immanamong ti defense panel nga awaten ken bigbigen ti amin a dokumento nga impasango ti prosekusyon.
Karaman kadagiti dokumento dagiti surat ni Vice President Sara Duterte ken dagiti opisial ti OVP, dagiti position paper ti OVP employees, dagiti surat mainaig iti panagdar-ayna iti congressional hearings, ken dagiti dokumento nga adda pakainaiganna iti subpoena ken confidential funds.
Kinumpirmaran ti depensa a dagiti dokumento ket adda iti kustodia ti House Archives ken dagiti kopya a naipasango ket mayannatup.
Gapu ta awanen ti kasapulan a maisaludsod ken ni Pareja kadagitoy a dokumento, pinalubosan ni Presiding Officer Francis “Chiz” Escudero a pumanaw iti witness stand.
