Idurduron ni Senador Raffy Tulfo ti nainget a pannusa kadagiti nairaman iti panagiwaras wenno panagang-angaw maipapan iti bomb threat kadagiti publiko a lugar kas iti tren, eroplano, barko, pagadalan, simbaan ken dadduma pay.
Nangipila ni Tulfo iti Senate Bill 2768 wenno ti Anti-Bomb Joke Act a dagiti mangiwaras iti palso wenno peke nga impormasion maipapan iti bomb threats, explosives, ken dadduma pay a life-threatening wenno destructive materials ket maipasango iti pannusa.
Dagiti aglabsing iti nasao a gakat inton maipaulog daytoy ket mabalin a maibalud iti dua agingga innem a tawen ken agmulta iti P100,000 agingga iti P5 million depende iti kinadagsen ti krimen.
Saklawen ti pannusa dagidiay ag-joke ti bomb threat babaen ti mail, electronic telepono, cellular phone, fax machine, telegraph, printed materials, video recording, social media ken dadduma pay a wagas ti komunikasion.
