Nakikaysa ti liderato ti Senado iti panagleppas ti Holy Month of Ramadan para kadagiti kabsat a Muslim.
Segun ken ni Senate President Francis Escudero, kagiddan ti panagleppas iti bulan ti Ramadan ket kararagna nga agbalin a dalan daytoy iti panagkaykaysa ken kappia ti pagilian.
Iti baet ti panagsisina-sina ti pagilian iti patangan ti pulitika ket nagtalinaed ti namnama a ti Eid’l Fitr nga agserserbi nga inspirasyon para iti panagkikinnaawatan ti kada Pilipino.
Ti pammati ken sakripisyo kadagiti Muslim iti panawen ti Ramadan ket palagip kadagiti amin a Pilipino iti kinapateg ti panagibtur, panangisakit ken panagayat iti padada.
Pinasingkedan met ni Senador Risa Hontiveros a saan nga ang-angaw ti impakita a debosyon dagiti Muslim kadagiti naglabas a bulan.
