Innaganan ni Senador Raffy Tulfo ni Department of Public Works and Highways (DPWH) MIMAROPA Regional Director Engr. Gerald Pacanan a mapapati a mangbingbingay ken mairanranud iti pondo ti flood control project iti Region 4B.
Iti panagdenggeg iti Senate Blue Ribbon Committee, kinuna ni Sen. Raffy nga adda kompania ni Pacanan a karaman iti maanomalya a flood control projects.
Ti kompania ni Pacanan ti mapapati a mangkonkontra kadagiti proyekto a ti 28% a naala a gatad ti proyekto ket maited iti proponent ken ti nabatbati ket maited kadagiti gagayyem a contractors.
Kinuna pay ti senador a makasapul ni Pacanan iti 18% idinto a 30% met kadagiti contractor.
Umabot iti 86.5% dagiti naikaltas ken kickbacks a maala idinto a 13.5 percent laeng ti gatad ti maipan kadagiti proyekto.
Impaganetget ti senador nga uray saan pay a nalpas wenno naaramid ti proyekto ket uppat a pulo a porsiento ti kickback ket mait-ited nga insigida iti proponent ken kadagiti contractor, ket maaramidda dayta babaen ti panagaramid ti maysa a fake accomplishment report a dokdoktorenda.
Pinasingkedan pay ni Sen. Raffy ti maysa a Ryan Altea a nagpayam-ammo ken ni Pacanan iti maysa a proponent isu a kasla well-connected dagitoy kadagiti opisyal iti gobierno ken iti baet ti kalokaonda ket naipromote pay laeng a nagbalin a director iti main office.
