Kiniddaw ni Senador Imee Marcos iti kabsatna a ni Presidente Ferdinand Marcos Jr a permaan a dagus ti gakat a mangisanud iti Barangay ken Sangguniang Kabataan Elections inton November 2026.
Segun ken ni Imee, innem a bulanen nga yur-uray dagiti barangay ken SK officials no maisanud wenno saan ti eleksyon, ket impaganetgetna ti karbenganda a mapakaamoan no agingga kaanoda iti puesto.
Binabalaw ti senador ti nabayagen a panangipasa ti kamara ti kopya ti gakat iti Senado kalpasan ti panangaprubarda idi Hunyo 11 ken Hunyo 15 laeng a naipasa iti opisina ti presidente.
Adda met tallopulo nga aldaw ni PBBM a mangperma wenno mangi-veto iti gakat ngem no kas bilang maysa bulan a saan a napermaan wenno ma-veto ket dagus nga agbalin a linteg.
No agbalin a linteg, maituding ti umuna a Lunes ti November 2026 a BSKE imbes nga inton Disyembre ita a tawen.
