Nangipila ni Senator Risa Hontiveros ti Senate Resolution No. 746 a mangkidkiddaw ken ni Presidente Ferdinand Marcos Jr nga ideklarar a persona non grata ni Chinese Ambassador Jing Quan weeno kiddawen iti gobierno ti China ti panagawid ti nadakamat a diplomat.
Nakabasar ti resolusion iti statement ni Quan a nadaras a mangabak ti China no maaddan ti tension iti nagbaetan ti Pilipinas ken China, kasta met ti agtultuloy a panaggaraw ti China iti West Philippine Sea.
Nadakamat pay iti resolusion ti pakdaar ti Chinese Embassy a mabalin nga iparitan dagiti opisial ti Pilipinas a makastrek iti China no maideklarar a persona non grata ti embahador.
Ti persona non grata ket panangibilang iti maysa a diplomat a saan a makapaay-ayo iti pagilian a pagserserbiyan na, a mabalin nga agresulta iti panakapapanaw na it pagilian.
