VIGAN CITY – Nu kumaro iti sitwasyon ditoy probinsiya kadagiti sumar-saruno nga aldaw iti kangitingitan ti coronavirus disease 2019, posible a mapawaywayan pay ti naiyetnag nga enhanced community quarantine ngem segun ken ni Governor Ryan Singson, nu manayunan ti COVID- 19 patient ditoy probinsiya ken nu la ketdi mabigbig nu anya a barangay iti naggapuan na, mabalin a daytan to laeng a barangay iti maisakup ti enhanced community quarantine.
Agyamyaman ni Singson ta kadagitoy a panawen ket puminpintas iti COVID- 19 situation ditoy probinsiya ta bumasbassit ti bilang dagiti persons under investigation ken persons under monitoring a mangipaneknek nga epektibo dagiti naiyetnag a pagannurutan tapnu maparmek iti nasao a sakit.
Nu ti umuna a COVID- 19 patient iti mapagpapatangan ket nasayaat metten iti kasasaad na ken dagiti nakapulapol na a health workers idiay Ilocos Sur District Hospital – Tagudin ket naka-quarantine dan ken awan iti masapul a pagdanagan inaig iti tulong kadagiti agindeg idiay Barangay Magsaysay, Tagudin agsipud ta nakasagana ti provincial government a mangtulong ti local a gobyerno ti Tagudin nu makurangan da iti suplay.
Kabayatanna, inlawlawag ti gobernador a ti laksid nga idiay laengen Tagudin, Cervantes, Sinait ken Narvacan iti kangrunaan a paka-inspeksyunan dagiti cargo a sumrek ditoy probinsiya, masapul a masurot latta dagiti immun-unan a naiyetnag a pagannurutan tapnu maliklikan iti panagwaras iti nasao a sakit, malaksid laeng kadagiti sakit dagiti dingwen kas ti African Swine Fever ken bird flu.
