Nagpalagip ti Armed Forces of the Philippines (AFP) iti amin a foreign nationals a kasapulan ti visit clearance-da sakbay a makastrek ken makaaramat dagiti recreational facilities iti kampo military pakairamanan ti golf courses, kasaruno dagiti pakaammo iti espionage nga adda pakainaigan idiay China.
Paset ti maipatpatungpal a polisiya iti AFP ti clearance requirement para iti siasinoman a kayatna iti makastrek kadagiti military installations.
Naallukoy dagiti gangannaet a planoda nga aramaten dagiti pasilidad iti AFP a makaala iti husto a clearance a nasapa ken suroten iti maipatpatungpal a pagannurotan iti seguridad.
Segun ti National Security Council, ti palagip iti AFP ket rimmuar kasaruno dagiti isyu iti national security kalpasan a naibalud iti tallo a Pilipino a mapapati a karaman iti espionage activities manipod idiay China.
Kinuna ni NSC Spokesperson Cornelia Valencia Jr. a natunton iti konseho iti mapapati a panagpatulod kadagiti listaan ti Chinese government babaen ti LinkedIn ken gaming apps.
Inlawlawag ni Valencia a naaddaan ti access ti tallo a Pilipino kadagiti nasao nga impormasyon iti agduduma a wagas.
Maysa kadakuada ket dati nga assistant iti Department of National Defense, ti maikadua ket dati a researcher ti Philippine Navy, ken maikatlo ket adda koneksyon iti maysa nga opisyal ti Philippine Coast Guard nga adda access iti sumagmamano a sensitibo a listaan.
Gapu dayta ket nangipatungpal pay ti Philippine National Police ken dadduma pay nga ahensya iti naing-inget a counterintelligence measures pakairamanan ti screening ken internal monitoring tapno maliklikan ti infiltration manipod kadagiti ganghannaet.
Segun ti AFP, umdasen iti agdama a security protocols ngem agtultuloy iti pangta ti espionage ken foreign interference ket mangipakpakita ti kasapulan iti nangato a vigilance kangrunaan kadagiti lugar nga adda overlap ti access ti publiko ken dagiti military installations.
