Impakaammon ti Municipality of Santa babaen iti panangidaulo ti Santa Municipal Disaster Risk Reduction and Management Office ken Municipal Disaster Risk Reduction and Management Council dagiti nakalinya nga aktibidad para iti panangrambak iti 2026 National Disaster Resilience Month (NDRM).
Gagem ti programa a masurwan ti komunidad nga agsagana no adda didigra babaen kadagiti aktibidad a nakapokus iti disaster awareness, panangaywan iti aglawlaw, pannakipaset ti agtutubo, volunteerism, ken panagtitinnulong dagiti umili.
Iti pannaki-uman ti Bombo Radyo Vigan ken ni MDRRMO Vincent Clyde Cardenas, karaman kadagiti naituding nga aktibidad dagiti inisyatiba para iti disaster resilience, coastal clean-up, school partnerships, bloodletting program, youth competitions, ken dadduma pay a programa ti MDRRMO.
Maitampok pay ti panagsubli ti Santalentado 2026, a gundaway dagiti agtutubo a maipakita ti talugadingda babaen kadagiti aktibidad kas ti “Beat the Risk: Youth Jingle Contest for Disaster Resilience” ken EduCreate, a mangawis kadakuada nga aramaten ti sining iti panangisaknap iti kinasagana iti klima ken didigra.
Ituloy pay ti Santa MDRRMO dagiti flagship community program-da kas ti Project BIBO, Project PAAWENG, ken Project PANYO tapno mapagtalinaed ti disaster resilience saan laeng a kada bulan ti National Disaster Resilience no di ket iti intero a tawen.
