VIGAN CITY- Sangapulo ket maysa nga estudyante ti Senior High School idiay Lussoc National High School idiay ili ti Sto. Domingo ti mapapati a nasaniban ti dakes nga espiritu isu a temporaryo a naipasardeng ti klase iti Grade 7 agingga Grade 12.
Segun kenni Edwin Tabor a maysa kadagiti mangisursuro iti nasao a pagadalan, kabayatan ti klase ket nagpasikkil ken narigatan a makaanges dagiti estudyante ket maysa kadakuada ti saan a kabaelan a pakalmaen dagiti pito a tao ken dinadael na pay ti rosaryo idinto a maysa ti nagpabigibg a ni Germinia Tapucol ,dati a mangisursuro ti pagadalan a nabayagen a pimmusay.
Malaksid kadagiti estudyante ti Senior High School ket mapapati nga adda pay uppat nga estudyante iti Junior High School iti nagkakapsot ken narigatan nga umanges ket naipan da amin iti ospital.
Gapu ti dayta a pasamak, napan ni Fr. George Tabangcura tapnu bendisyonan iti pagadalan ken mangisagut iti kararag kadagiti dakes nga espiritu ken kararuwa a mapapati a nangsanib kadagiti estudyante.
