VIGAN CITY – Kaso a panaglabsing iti Presidential Decree 1602 wenno ti Anti Illegal Gambling Law ti sangwen dagiti sangapulo ket dua a nagtatadi a nakemmeg idiay Brgy. Tarangotong, Tagudin.
Nabigbig dagiti suspek a da William Murao, agtawen iti uppat a pulo ket uppat, mannalon, Brando Estabillo, agtawen iti uppat a pulo ket dua nga agpada nga agnaed idiay Alzate, Bangar, La Union; Carding Gavina, agtawen iti duapulo ket walo, drayber, Roberto Acosta, agtawen iti tallopulo ket pito, mannalon nga agpada nga agnaed idiay Pudoc East; Jun Lacasandile, agtawen iti tallopulo ket siam, mannalon, Mario Josue, agtawen iti tallopulo ket maysa, drayber, Domingo Balao Jr., agtawen iti tallopulo ket siam nga agpapada nga agnaed idiay Sawat.
Malaksid kadakuada, nakemmeg pay da Wilfreo Lacosta, agtawen iti limapulo ket lima, drayber, Alex Lambinicio, agtawen iti uppat a pulo, mannalon nga agpada nga agnaed idiay Pacac; Bernard Victoria, agtawen iti tallopulo ket tallo, drayber nga agnaed idiay West 1, Bangar, La Union; Joel Lopez, agtawen iti uppat a pulo ket lima nga agnaed idiay Agdeppa, Bangar, La Union ken ni Florendo De Fiesta, agtawen iti innem a pulo ket dua, mannalon nga agnaed idiay Pudoc East.
Naala kadakuada ti walo a manok a pangtadi, dua a folding cages, uppat a karton ken naipanen dagiti suspek iti Tagudin Police Station tapno dumalan iti husto a proseso.
