Idurduron ni Albay Rep. Adrian Salceda ti gakat a mangilaksid iti buwis ti pastrek dagiti mangisursuro nga agserbi kas Board of Election Inspector ken dadduma pay nga election worker kada eleksion.
Segun ken ni Salceda, ti mapukaw a pastrek ti gobierno iti gakat ket umabot iti P100 agingga P150 million kada eleksion.
Iti salinong ti House Bill 7387, maamyendaran ti Section 32(B)(6)(A) ti National Internal Revenue Code of 1997 tapno mailaksid iti income tax ti pastrek dagiti mangisursuro ken dadduma pay a government employee nga agserbi kas Board of Election Inspector, technical support staff, data encoder, IT personnel, ken transmission operator iti national ken local elections.
Iti agdama a tax law, ti honoraria manipud iti Commission on Elections ket maibilang a paset ti gross income a mapatawan iti income tax.
