Pinasingkedan ti abogado ni dati nga House Speaker ken Leyte Rep. Martin Romualdez a nakasagana ti kongresista a sangoen ti aniaman a kaso a mabalin a maipila kontra kenkuana.
Daytoy ti impaganetget ni Atty. Ade Fajardo mainaig ti statement ni Ombudsman Jesus Crispin Boying Remulla nga agsagsagana ti opisina para iti panagipila ti plunder case kontra ken ni Romualdez.
Segun ken ni Fajardo, maipagarup nga awan ti partisipasion ni Romualdez manipud panag-pondo agingga implementasion ti flood control projects isu nga awan ti ebidensia a maidatag.
Karaman kadagiti nangpabasol ti dati nga house speaker dagiti dati a bodyguard ni former House committee on appropriations ken former Ako Bicol party-list Rep. Zaldy Co, no sadino inbaga da a nag-deliver da ti naka-maleta a kuwarta ken ni Romualdez.
Maipalagip a boluntario a bimmaba ti agpampanday linteg iti puwesto kas house speaker tapno maikkan dalan ti imbestigasion.
