Pinasingkedan ni dati a Public Works Secretary Rogelio “Babes” Singson a ti panagikkatna iti Independent Commission for Infrastructure (ICI) nga epektibo inton December 15 ket gapu iti salun-at ken pagkurangan iti bileg ti komisyon.
Impaganetget ni Singson a ti ICI ket limmaban nga awan iti husto nga armas ken ti sumagmamano a kamengda ket agtrabtrabaho a boluntaryo iti uneg iti tallo a bulan.
Inallukoyna iti Kongreso nga aprubaran dagiti linteg a mangted ti bileg a legal iti komisyon tapno imbestigaran ti anomalia iti flood control pakairamanan ti pannakairuar ti subpoenas, preventive suspension ken contempt powers.
Kinuna pay ni Singson a saan isuna a napilit nga agikkat ken saan a nakasarita ti presidente maipanggep ti ICI.
Inlawlawagna a ti panagikkatna ket gapu iti salun-atna pakairamanan ti reseta para iti nangato a presyon iti dara, cholesterol ken uric acid.
