VIGAN CITY – Patien ni Magsasaka Partylist Rep. Argel Joseph Cabatbat a ti Rice Tariffication Law ti rason iti nalaka a presyo ti irik nga umabot laeng ita iti sangapulo ket maysa agingga sangapulo ket tallo a pisos iti tunggal kilo.
Iti pannaki-uman ti Bombo Radyo Vigan ken ni Cabatbat, saan a pudno ti inkari ti gobierno a malag-anan ti biag dagiti mannalon no maipatungpal ti Rice Tariffication Law ta dagiti pudno a mabenepisyaran ket dagiti import traders.
Gapu ti dayta, kayat ni Cabatbat a maadal a naimbag no adda ti nasayaat nga epektona kadagiti mannalon ti nasao a paglintegan ta napateg a maikkan ti atensyon dagiti husto nga agimulmula ken mangpakpakan ti kaaduan kadagiti Pilipino.
Kiniddaw ti kongresista a maikkan ti nadakdakkel a pondo ti agrikultura ta mamati a saan laeng nga isu ti mangsalbar kadagiti Pilipino iti panagbisin no di ket iti ekonomia ti pagilian.
