Dead on arrival ti maysa a retirado a suldado a napaltugan iti Diversion Road a sakupen ti Barangay Cabaroan, Bantay, Ilocos Sur.
Nabigbig ti biktima a ni Zosimo Blanco, retirado a suldado, ken taga-Barangay Vacunero, Sto. Domingo.
Iti pannaki-uman ti Bombo Radyo Vigan ken ni Police Captain Donaldson Pagalanan, Officer-in charge ti Bantay Municipal Police Station, ti biktima ket agturong iti Vigan City Public Market tapno gumatang ti karne a lakona.
Nakalugan iti traysikelna ti biktima idi inasikgan ti riding-in-tandem a nangpaltog kenkuana a nagsagabaanna iti tama ti paltog ti bakrang ken takyagna.
Nabigbig met ti nagluganan dagiti suspek a maysa nga scooter, agmaris iti orange, white ken black.
Naala iti nakapasamakan ti pammaltog ti lima a basyo wenno kapsula ti mapapati a caliber 45.
Agtultuloy ti panangduktal dagiti pannakabagi ti linteg no ania ti posible a rason ti nangpaltuganda iti biktima.
