VIGAN CITY – Pinasingkedan ni Ilocos Sur 1st District Rep. DV Savellano nga yur-urayda ti pormal a panangipila ni Pampanga Rep. Mikee Arroyo ti resolusyon sakbay a pagsasaritaanda ti pannakaisanud pay laeng ti 2022 national and local elections gapu iti Covid19.
Iti pannaki-uman ti Bombo Radyo Vigan ken ni Cong. Savellano, nakailanad iti konstitusyon nga iti tunggal tallo a tawen ket masapul nga adda ti maangay nga eleksion isu nga agsagsagana latta ti Commission on Elections.
Patien ti kongresista nga ikonkonsidera laeng ni Arroyo ti kasasaad ti tunggal mapan agbotos ta saan a natalged kadakuada no matuloy nga adda pay laeng ti sangsangwen ti pagilian a pandemia.
Iti agdama, awan pay laeng ti pinal a desisyon ti kongreso no maaprubaran ti maisingsingasing a pannakaisanud ti eleksion ngem nakasagana dagiti padana a kongresista a makipaset iti deliberasyon no man bilang mairuginton.
