VIGAN CITY – Nagpalagip ni Brgy. Captain Erwin Atayan iti Pagsanaan Sur, Magsingal ti umili iti panagdalus ken panangikkat iti pagitlogan iti lamok gapu iti nairekord a natay iti dengue iti masakupanna.
Iti pannaki-uman ti Bombo Radyo Vigan ken ni Atayan, ti nasao a dengue patient a natay ket on and off iti panaggurigorna ngem saanna nga inkaskaso nga insigida ta nagbuteng nga amangan nu maideklara a covid-19 patient ngem idi nagkapsuten ket impan ti pamiliana iti Tolentino Clinic a nagnegatibo iti resultana iti dengue ngem kimmaru ti kasasaadna isu a naipan iti Ilocos Sur Provincial Hospital Gabriela Silang ngem pimmusay ket naduktalanda laengen a positibo a na-dengue.
Gapu iti dayta ket kas addang tapno maliklikanen iti pasamak ket kiniddaw ti kapitan iti Rural Health Unit a mangisayangkat iti fogging iti lugarda isu a napatgan ngem saan a nalpas amin a paset ta nadadael iti fogging machine isu a matuloy ita nga aldaw.
Pinasingkedanna pay nga adda manen iti nairekord a natay idi napalabas a tawen gapu iti dengue isu a naipatungpal iti ili ti Magsingal iti Oplan Taob nga amin nga agindeg ket kasapulan nga agdalus iti paraanganda kangrunaan iti posible a pagtaudan iti lamok.
