Nakipagladingit ni Pres. Ferdinand Marcos Jr. kadagiti pamilia dagiti biktima ti nagsaruno a trahedya iti SCTEX ken NAIA Terminal 1.
Gapu dayta ket adda ti bilin ti presidente ken ni Department of Transportation (DOTr) Secretary Vince Dizon tapno saanen a maulit iti trahedya kadagiti kalsada.
Kinuna ti presidente a rumbeng a maadal ti sistema iti panangted ti lisensiya iti panagmaneho kadagiti mayannatup a tattao ken panangisayangkat ti audit iti amin a bus operators iti intero a pagilian nga addaan ti nalawag a pannusa kadagiti saan a sumurot iti standards.
Namnamaen pay ti presidente iti Department of Labor and Employment a kitaenda dagiti managgundaway a nakasanayan ti sektor iti transportasyon kas iti napaut nga oras a panagmaneho ken panangipan ti quota a gappuanan ti driver fatigue a rason ti pagpeggadan ti biag dagiti pasahero.
Impaganetget ti presidente a rumbeng nga adda madusa kadagiti napasamak tapno maipaayan ti hustisya dagiti biktima ken mapatibker ti transport system a mangted iti salaknib kadagiti Pilipino.
