Nagpanawagan ni Akbayan Party-list Rep. Chel Diokno iti Department of Education (DepEd) a tignayan ti agdama a kultura a panagulimek kadagiti biktima iti bullying kasaruno iti pammaltog iti maysa a pagadalan idiay Tacloban City a nakatayan iti tallo nga estudyante ken nakadunoran iti duapulo pay a sabali.
Iti pakaammo ket mapapati a biktima ti bullying dagiti dua a menor de edad a suspek iti insidente iti San Juan National High School.
Impaganetget ni Diokno a rumbeng nga agtalinaed a natalged dagiti pagadalan ken awan ti lugar ti bullying kadagiti institusyon iti edukasyon.
Kiniddawna pay iti nainget nga imbestigasyon iti posible a pagkurangan ti seguridad kalpasan a nakaiserrek iti paltog iti uneg iti pagadalan.
Kinunana pay a rumbeng a matignayan dagiti kinaranggas pakairamanan ti bullying, dagiti parikot iti pagtaengan ken online spaces, kasta payen ti panangsimpa ti regulasyon ken pannakaipatungpal ti linteg maipanggep ti paltog.
