VIGAN CITY – Mangrugi itatta ti rapid damage assessment idiay Region IV – B nangruna idiay Oriental Mindoro a naglandfall-an ti bagyo Tisoy idi kalman.
Ti pannaki-uman ti Bombo Radyo Vigan kenni Information Officer OCD-MIMAROPA Efril Maranan, nadakamat na a maibasar iti listaan ti Department of Social Welfare and Development, umabot ti 36,021 a tao iti nagbakwit ken agtaltalinaed kadagiti tallo pulo ket tallo nga evacuation center a pakabuklan ti siam a ribo tallo pulo ket innem a pamilia.
Innayon na pay nga uppat iti naireport kadakuada a natay idiay Oriental Mindoro ta natupakan da ti kayo ken debris gapu iti napigsa a todo ken angin nga epekto ti bagyo, nangruna idiay Bako ken Kinalamayan.
Inpasigurado na a sakbay a dimmuprak ti bagyo iti nasao a lugar ket nangisayangkat dan ti pre-emptive evacuation isu a dagiti agnanaed kadagiti delikado a lugar ket adda dan kadagiti evacuation center.
Mainaig dayta, nasuspenso iti klase dagiti amin nga agad-adal idiay Oriental Mindoro, Romblon, Marinduque, Occidental Mindoro ken dagiti sumagmamano nga ili idiay Palawan.
